Es schneibt da nosse dicke Botzn ins Gsicht. Und do in da Fußgängerzone is ka Weidakumma. Olle schleuderts. De Kindawagln. De Oidn mitn Steckn. Und mi schleuderts a. Wer rechnt scho mit sowos. Da erschte Schnee pünktlich am erschtn Einkaufssamstog. I bin bockmäßig no übahaupt ned wintafest. Kana is des. Olle kräulns no umadum mitn Summaprofil. I hantel mi schee langsam weida. Von Gschäft zu Gschäft. De Favoritnstroßn obe. Und in de Auslogn kummt ma vua schneibts scho vü länga. Ollas volla Schnee. Da schlanke Ballschuh hochmodisch und eingschneibt bis zum Knöchel. Und von dera lila Kombinesch schaut nua des Brustteil mit da zoatn Spitze vire unta ana Schneewächtn. De Untagatte und da Strumpfbandgürtel de wos dazuaghean zu dera lila Kombination san ziemlich schneefrei. Nua a bißl anzuckert. Dafia hams a Tannenzweigerl angsteckt und an goldenen Stern von Bethlehem wo da Sonderpreis draufsteht. Siebenhundertochtaneinzig.

Da erschte Schnee heia. Ausnahmsweis pünktlich. Am erschtn Einkaufssamstog. De Gschäftsleit ham eana Freid. De Kinda ham eana Hetz. Und i hobs eilig.

Es is a anzige Rutschpartie durch den graun Gatsch dea wos weiß vom Himmel kummt. De Gschäftn ham offen bis um sechse. Und de Damen fian ihre Wintapelz äußerln. Foische Persianer und echte Kiniglhasn. Seehund. Und rote und silberne Fuchsn. De Damen san olle auf da Suche noch an passenden Geschenk fian splendiden Spender. Goldene Manschettenknöpf. Goldene Krawattennadel. Goldene Uhr. Goldene Geldspange. Was ma so braucht hoit. I hobs echt eillig. A wichtiga Termin. Und trotzdem rett i ana echtn Plüschleopardin das Lebn. I bin zur Stelle wias von an Spuatwagerl gschnittn wiad auf brutal und es sie fast am Oasch haut. Sie tuat ganz faszinierend lächeln und wü grod danke sogn. Do erledigt des a ziemlicher Bär von an Mann. Goaned freindlich. Hod an Blick wia a Piranha da Bär. Und an graun Wintamantel an. Tarnfoab. Damitst eam ned glei merkst im erschtn Schnee.

Da erschte Schnee heia. Ausnahmsweise pünktlich. Am erschtn Einkaufssamstog. De Gschäftsleit ham eana Freid. De Kinda ha10 eana Hetz. Und i hobs glei wieda eilig.

Druck mi vuabei an platzate Kinda de wos den super Panzerkreuzer ham wolln vom Christkind. Oba de Mama sogt: So a Klumpert bringt des Christkind ned. Des Christkind bringt den Frieden auf Erden. Und den Panzerkreuzer kennts eich zum Geburtstog wünschn. I wünsch ma de Favoritnstroßn schneefrei und ohne Leit und Wintapelz und Gschroppn de wos se vua Zuan in Gatsch haun weu i wü weidakumma. Und do rennt ma ana eine. Eingschneibt und zuagschütt. Des Summagwand in Nylonsackln. De Wintapania hod a au. Janker zwa in 1. Anorak. Wintamantel. Ollas von da Rotkreuz-Sammlung. De Schnürlsamthosn hod mea blanke Fleck ois Schnürln.

Host a Späh? Sogta.
Jo. Sog i und zah es Packl auße.
Host a Feia a? Sogta.
Mit dera Fahne ane raukn. Denk i ma. Der muaß a Feiaschlucka sei weu sunst geht des schlecht aus. Er raukt se den Tschik au schluckt des Feia und sogt:

Da erschte Schnee heia. Ausnahmsweis pünktlich. Am erschtn Einkaufssamstog. De Gschäftsleit ham eana Freid. De Kinda ham eana Hetz. I waaß des. I waaß des von fria.

Jojo. Sog i. Weu i habs eilig. Oba er steht do und raukt und zagt auf die vaschneibtn Auslogn und sogt: Hob i ois ghobt. Fria. Und an Kadett und a Saisonkortn fias Stadionbod. Ois. Imma Habdacht gstandn in da Hockn. 23 Joa. Bis es zuagjankert ham de Bude. »Möbel-Blaschko« wannst kennst. A Stückl weida untn wo jetztn de Spoakassa drin is. 23 Joa. Wannst waaßt wos i man. De Oide is ganga. Afoch so. Da Bua tät mi ned griaßn wanna mi heit auf da Stroßn siacht. So is des. 23 Joa ghacklt fia nix. Do gibts nix zum vasteh. Des mocht nua durschtig.