Wie da Favorit'n Blues erfunden wurde
(Die komplette Fassung der Geschichte in der nicht jugendfreien Langform)

Am 20. April 1993 im Vindobona erzählt

Awos.
[Foaschein]
Awos Foaschein.
Weu imma wieda die jungen Menschen wissen woin wia des damals woa vua 28 Joa wie mia die heilende Wirkung des Favorit'n Blues entdeckt ham.
[Foaschein]
Hoit's di Goschn. Des is a schreckliche Unoart. I fang an mit ana Enthüllung. Vastehst, andere warten 10, 15 Joa daß wos erfoarn. Des is jo ka Oart ned. Söbst wenn's di ned interessiert, tua so wie waunns die interessierat. Du kannst do ned "Foaschein" schrein, von mia aus foar schwoarz, Trottel. Waunnst jung bist und peulisiern kaunnst, die Herrn Kontrolleure san oftmaois ned so guat zu Fuß. Auf da Ebene hob i di - oiso früher, i waaß ned wias heite is - auf da Ebene woas oftmois gleichauf, oba dann die Stiagn auffe, buh! do sans oft hint bliebn. Heitzutage bin i jo mit da Netzkarte unterwegs. I vagiß hoit imma. Dann sog i imma, "Oba i hob a Netzkoartn" - no is Wuascht, is a andere Gschicht.
Eigentlich hob i jo glaubt, daß di jungen Menschen - oiso die Ölteren wissn des eh, weus söba dabei woarn - daß di jungen Menschen mea interessiert san, wia da Favorit'n Blues in Wirklichkeit entstanden is.
In Edi Jedelsky interessiert - du schreist do bled ummatum, okay des hob i mi scho g'wöhnt, ...
[Edi] [Bertl] [Gusch]
No, mid eich is leiwand! So stöll i ma vua, waunn die letzten Geheimnisse der Bibel eröffnet werden:
"Awos Bibel. Geht's in Oarsch"
Na, des is jetzt boid 28 Joa hea, mia san g'sessen im Kabinett vom Karasek-Fredl - wos da Voda vom Fredi is - oiso da Vata vom Leopold, für unsere ausländischen Freunde - und ham den langsamen Blues g'spüt wia sa se g'heat. Im Gitterbett - es woa eigentlich, sie ham eigentlich auf Zimmer/Kuchl/Kabinett g'wohnt - des Kabinett woa es Kinderzimmer - ein junges Kind sprang im Gitterbett auf und nieder, mit ana klanan Sperrhoizgitar in da linken Hand. Jedoch - es war der kleine Poldi. Ea hod Hos'n und Gilet in an g'hobt und hod mit da Spearrhoizgitar wia ein Idiot auf die Sprissln vom Gitterbett g'haut. Mia ham damois g'sogt, "No, is jo Wuascht - a deppats Kind. Es muaß deppate Kinda a gebn." Heit wo ma mea psychologischa des ganze siecht, tät ma sogn, daß des is doch a gewisse Belastung auch woa, psychologisch fia des Kind, daß do so laut Musik g'spüt wuan is in sein Kabinetterl imma. Er hot heite davon, dadurch daß ea imma so stoak mit da Sperrhoizgitar auf di Sprissln g'haut hod, den festen Griff, den er später noch verfestigen konnte in der Pubertät durch andere Tätigkeiten, de wos eich oba nix angegan, und so bringt ea heite so manches Griffbrett ins Schwitzn. Oiso wenna zuagreift. Ea zwingt jo di Saitn zuwa, des is Wahnsinn. Oba is jo Wuascht. Ea woa damois a Kind, waunn ea g'want hod, hod'a a Poa Watschn kriagt - aso, jo eh ned. Heute is des ganz anders - nie eine Kinderwatschn!
Es is ja, da ältere Mensch denkt si oft, "Dem Kind g'hearat a Watschn". Nein, moch ma nicht.
Oba, mia hom eigenlich vom langsamen Blues gesprochen, oiso da wirkliche, echte Blues, wia eam jo nua da oide echte Bluesnega spüt. Oda da Simmaringa, oda die Simmaringarin - daß ma geschlechtsneutral bleib'n. Hamma g'spüt. 28 Joa wirds boid hea sei. Es woa kurz noch'n Ess'n, Wuaschtknedln hot's geb'n und die Karasek-Mutti, die wos di Mutta von eeam is, di wos eam a di vün Vanillikipfaln imma bockn hod, wia ea den Wödrekoard fia des Guinness-Buach (von da Brauerei des Buch) - daß ned haaßt, daß de Biatrinka ned lesen kennan, homs a Buch außebrocht, des Guinness-Buch. Und do is ea drin g'standen wegen seine Vanillekipfalrekorde, wo ea da Karasek-Mutti 11 neiche Führungen einegniat hod ins Backrohr damit's mea Vanillekipferln, mea Blech einebringt. Weu jo des Vanillekipferl in da Höhe kaum auftrogt. Und i hob mi wirklich imma g'wundat, sie wirklich des extra g'wuzlt und dann sogoa bogn, und ea hods warm vom Blech obag'fressn. I hätt eam den Tag so geb'n - so wie ein Stiefonkel von mia - den wos es ned kennts - g'sogt hod, er hod g'sogt, "Im Mogn kummt e ollas z'samm". Zueascht des Wuzln und dann des Biagn a no, vaschtehst! Zumindest ois Stangal auflegen - oba extra segmentieren und auf Kipferl biagn... oba es is Wuascht. Da warme Tag - oiso da Herr Horak mocht si Suagn, daß da warme Tag blähend sei soi. Ich weiß es nicht. Wos sogst du? Du, waunn eam wos bläht, dann bläht eam ois. A blähde G'schicht. Jetzt wiss ma nimma wo ma woarn, außa daß ma eigentlich scho hamgeh kunntn, kollektivvatrogsmäßig seit an hoibn Stund.
[Bertl]
Auf'n Bertl scheißt da Hund drauf!
Jo, des san jetzt praktisch unbezahlte Übastunden wos mia do mochn. Und so schaut das Programm auch aus, meine Damen und Herrn!
[Foaschein]
Geht's scheißn! Do wea ma no segn, wea mit wem Schlittn foat!
Mia san im Kabinett g'sessn, bei da Familie Karasek in da Hasnleitn, do woas damois neich die Siedlung. Heite trog'n s'as glaub i scho o. Des woan diese Bauten, die ned so lang g'haltn ham. Zimma/Küche/Kabinett wie gesagt. Mia s'pün den langsamen Blues. Wuaschtknedl hot's gebn. Jetzt fallt's ma wieda ei: Das Wuaschtknöd, des Wuaschtknödl hod wos magisches: Zum Beispü: Waunnst z'Mittog a Wuaschtknedl essn tuast und host auf'd Nocht an Termin. Do wirds dann esoterisch. Da Gesprächspartner weiß sofort, wos du z'Mittog g'essen host. Des is - durch di runde Form des Knödls übatragt si des esoterisch auf deinen Gesprächspartner/deine Gesprächspartnerin.....
[Karasek: Ißt du a Knedl im ganzen??]
I waaß söba ned, oba jeder weiß noch 24 Stunden nach dem erfolgten Genuß und sogt, "Aah! Homma a Wuaschknedl g'essn!" I waaß söba ned warum. Des is so wia mit'n Horoskop - es san vielleicht auch die Sterne, daß die Sterne das Wuaschtknödl lieben. Es muaß auch ähnlich sein beim Fleischlaberl - in erster Linie. Oda auch beim Lebakaas vom Gigara - oiso auch der hoit lang an. Wia ma auch öfters spricht, das Schnitzerl vom Pflasterhirsch. Wenn ma des genossen hod, do waaß ma a oft lang nochher no, "Aah! Hamma an Lebakaas g'essn!" und niemaund waaß, wiaso des da Gesprächspartna ahnt. Und deswegn kumm i auf die Esoterik.
Wo woa ma? Beim Pflostahiasch!
[Foaschein]
[Horak: Gusch, schreits ned, waunn Erwachsene redn!]
Die Gummistiefelpartie von de Gaaßpuderanten? Des is rein nua a Sexualpraktik. Die Schof- und Gaaßpuderanten stellen das Tier in Gummistiefel - na wirklich! Weus jo sonst oftmois davonflieht. Waunn sie im Arbeitsschuh des Landwirts steht, is es praktisch gehalten am Ort zu bleiben. Na wirklich! Oiso wea a Interesse hod, i hob amoi an troffn, am Land - i sog ned des Bundesland - der hod seine Gaaßen wirklich geliebt. Der had eana a Wohnzimma baut und bei eam im Wohnzimmer hods ausg'schaut wia im Stall.
[I glaub du host z'vü Woody Allan Füm g'sehg'n]
Na, es is woa! Sozusogn in da ganzen Vorgeschichte, die Uazeit, da Uamensch, da Bronzemensch, da Steinzeitmensch, okay sie hod kane Gummistiefel g'hobt. Oba wos glaubst wos di Gaaßn pudert wuarn san. Keine Frage. Na wirklich. I man des san di Sochn, des wos nie besprochn wird. Zum Beispü wia si wea in Oarsch owischn tuat. Wievü lagig oda wia oft. Oda ob ma die Gaaß pudert oda ned. Des passiert imma wieda und es wird ned besprochn.
[Horak: Die Karasek-Mutti hot Wuaschtknedl g'mocht...]
Mia ham die Wuaschknedl g'essn - oba i woit jo des sexuelle, i hob ma gedocht, i moch a bißl auf Lebenshilfe. Des is okay, nimm Gummistiefel mit.
Wuaschtknedl hamma g'essn.
[Horak: Vom Wuaschtknedl zua Gaaß.]
Die Gaaß mocht Pemmerln, kane Knedl.
[Horak: I hob g'sogt, des is a weita Weg]
Na, des is a weites Feld. Okay.
Mia hom die Wuaschtknedln g'essn g'hobt ...
[Kemma wos singan, bitte!!!]
Sing!! Mia is recht!
Zum Beispü: Gemeinsam die Bundeshymne - wa a Wahnsinn.
[Publikum steht auf]
[Horak: I hob fria imma im Roten Engel g'püt, do is imma ana kumman und hod g'sogt: Es gibt 2 Bundeshymnen, de ane kemma eh olle, die zweite is "Lustig ist das Zigeunerleben". Spü: "Lustig ist das Zigeunerleben". I hobs nie g'spüt.]

Lustig ist das Zigeunerleben

Höchstes Niveau!
Wuaschtknedln, jo.
28 Joa wird's jetzt boid hea sein. Okay, jetzt sans scho boid 29 Joa. In da Hasenleitn, in de Bauten, wea's kennt.
[G'schichtln!]
Bledsinn. Is ois woa! In de Bauten, auf Zimma/Kuchl/Kabinett ham's g'wohnt.
Na, es is nua wengan Fototermin. I erledig des ollas jo nebenbei. 3 Fototermine, a Konzertl, des moch i ollas mit links. Des wirkliche Leben is aundas wo. Des moch i jo ollas profimäßig.
[Horak: Du host ja wirkli wos los.]
I sog imma, "Los hob'n tua i scho wos." Kennts stoiz sei auf mi.
[Horak: Wuaschtknedl]
Ajo, bei de Wuaschtknedl woa ma. Des muaß jetzt so 28, 29 Joa hea sei. Mia sitzn beim Karasek im Kabinett und spün den langsamen, wirklichen, echten, oidn, amerikanischen Blues. Wuaschtknedl hamma g'essn. Jetzt steßt's ma grod auf. A bißl übawürzt miaßn's gwesn sein. Auf olle Fälle hamma a pözige Papp'm g'hobt. Hamma oba nichts desto trotz mecht i sogn den langsamen Blues g'spüt. Die Karasek-Mutti hot unterdeß in da Kuchl - wea's kennt, die Heata, a bißl mollig, oba a fesche Gredl - hot in da Kuchl og'woschn daweu. Da Fredl woas gwehnt, der wos da Voda von eam woa, waaßt eh, da blaade Postla. Da Fredl woas g'wehnt, ea ruaft auße, weu die Heata is eh in da Kuchl, und do is eh wuascht. Ea hod imma g'ruafn "Heata!" und sie hod via Bia brocht. No, und weu möglichaweise die Wuaschtknedln übawürzt woarn, hamma glei amoi beim dritten Chorus vom ersten langsamen Blues scho so a pözige Pappm g'hobt. Und ea sogt "Heata!" und es is nix. Die Heata hod so schlampat og'woschn, daß glei fertig woa und dann woas draußn, scho tratschn mit de Nochbarinnen.

Des is a andere Gschicht. Des Phänomen, i man i waaß ned ob's eich interessiert, mia kennan a eigene Seminargruppe gründn, ob ma nua in die Muschl im Bod brunzt oda in die Obwosch a. I find in die Obwosch brunzen is z'vü. Oiso scho im Bod, oba in da Obwosch - des is, i kanns ned erklärn, weu des Wossa rinnt jo von obn oba - oba da brunzt ma a Ungunstl in die Obwosch, i waaß ned. Mia tät des Essn ned schmeckn.
Eröffnet's du jetzt die Debatte?
[Horak: I sog soweit: I brunz nua ins Bod. Oba des gern, do leg i mi imma auffe. In die Bodwaunn brunz i so oda so.]
Imma?
[Horak: Nicht immer, aber immer öfter!]
Die Menschheit teilt sich in 2 große Gruppen: Die an brunzen sie ins Bodewossa, und die andern ned. Oba des woa dei G'schicht. Wo woa ma stehngeblieben?
Die Herta hod scho fertig o'gwoschn g'hobt, woa draußen am Gang. Jedoch sie konnte nicht hören als der Fredl - da King, da Voda von eam, da Alfred - "Herta!" rief. No, mia spün weida den langsamen Blues. A bißl a pözige Pappm hamma scho g'habt, ich will es nicht verhehlen. Und ea sogt, "Heata! Heata!" Jetzt ham mia glaubt, daß eam da langsame, echte, oide, anmerikanische, schwarze Blues von uns zu weich gespielt erscheint, nau hamma a bißl audruckt. Ea hod des oba ned begriffen weu ea hod nua glaubt, daß uns de Heata via Bia bringan soi. Nau und zurnig is ea a scho g'wesn. Do schreit a: "Heata! Heata!" und mia ham auf amoi g'schwaaßt wia de Blödn, so hoat wia ma no nie im Lebn g'spüt ham. Und so hamma den Favorit'n Blues erfunden. Und so klingt'a, meine Damen und Herrn!

Kumm ham

© 1993  Kurt Ostbahn